Танай бизнес байгууллагад зардаг уу (B2B, business to business), эсвэл хувь хүнд зардаг уу (B2C, business to consumer)? Контент маркетинг аль алинд нь ажилладаг. Гэхдээ худалдан авагч нь өөр учраас контентын төлөвлөлт, агуулга, хэлбэр, түгээх суваг нь мэдэгдэхүйц ялгаатай байдаг.

Энэ ялгааг ойлгохгүйгээр B2C-ийн аргаар B2B маркетинг хийвэл, эсвэл эсрэгээрээ, цаг, мөнгө үрэх нь элбэг. Энэ нийтлэлд дөрвөн гол ялгааг тайлбарлаж, өнөөдөр AI-г хоёуланд нь хэрхэн ашиглаж болохыг нэмж оруулав.

Контентын стратеги эхлэхээсээ өмнө хэнд ярьж байгаагаа тодорхой болгох хэрэгтэй.

Холбоотой: Зорилтот хэрэглэгчдийн персона болон худалдан авалтын замнал гэж юу вэ?

1. Төлөвлөлтийн ялгаа

B2B: Бүтээгдэхүүн, үйлчилгээ нь нэг хараад ойлгогддоггүй байх нь элбэг. Шийдвэр гаргахад олон хүн оролцож, шийдэл, үнийн харьцуулалт, танилцуулга, хэлэлцээрийн уулзалт хийгддэг. Тиймээс контентын төлөвлөгөө олон шаттай, урт хугацаанд хэрэгждэг.

Ийм урт замаар орж ирсэн худалдан авагч өөрт юу хэрэгтэй, ямар асуудлаа шийдэх гэж байгаагаа сайн ойлгочихсон ирдэг. Тиймээс чанартай сэжим болж, борлуулалт амжилттай болох магадлал өндөр байдаг. Энэ үйл явцыг сэжмийн арчилгаа (lead nurturing) гэдэг.

B2C: Бүтээгдэхүүн илүү энгийн, ойлгоход хялбар тул цөөн шаттай контент хангалттай байж болно. Жишээ нь шар буурцгаар хоол хийх жорын контент үзсэн хүнд шар буурцгийн сурталчилгаа хүргэхэд худалдан авалт хийхэд хангалттай байж болох юм.

Холбоотой: Инбаунд маркетингийн сэжмийн арчилгаа, түүнийг хэрхэн хийх вэ?

2. Агуулгын ялгаа

B2B: Худалдан авах шийдвэрт логик харьцуулалт, оновчтой тооцоо илүү нөлөөлдөг. Тиймээс контент нь функц, шийдэл, өгөөж, эрсдэлийг тодорхой харуулсан, илүү нарийн агуулгатай байна.

B2C: Хэрэглэгч үнэ, үзүүлэлтийг харах ч шийдвэрт брэндийн танигдсан байдал, таалагдах эсэх, итгэл, бусдын бодит түүх, хувь хүний мэдрэмж хүчтэй нөлөөлдөг. Худалдан авалтын замнал богино тул агуулга товч, тодорхой, ойлгомжтой байх ёстой.

Гэхдээ B2C дотор ч эрүүл мэнд, үл хөдлөх хөрөнгө зэрэг удаан бодож, олон шатаар шийддэг бизнес бий гэдгийг бүү мартаарай. Тэдэнд B2B-тэй төстэй гүнзгий контент хэрэгтэй.

3. Контентын хэлбэрийн ялгаа

B2C-д сайн ажилладаг хэлбэр:

• Reels, богино видео: эхний секундээсээ анхаарал татах
• Постер, карусель, инфографик: нэг хараад ойлгогдох
• Шууд нэвтрүүлэг: бүтээгдэхүүнээ бодитоор үзүүлэх
• Уралдаан, челленж: оролцоо, түгээлтийг нэмэх
• Story: өдөр тутмын, албан бус харилцаа

B2B-д сайн ажилладаг хэлбэр:

• Блог нийтлэл, гарын авлага: асуудлыг гүнзгий тайлбарласан
• Кейс: тодорхой асуудлыг хэрхэн шийдсэн жишээ
• Харьцуулалт, тооцоолуур: шийдвэр гаргагчид хэрэгтэй тоо баримт
• Вебинар, танилцуулга: багаараа үзэж хэлэлцэх боломжтой
• LinkedIn нийтлэл: салбарын мэдлэг, удирдлагын үзэл бодол

B2B контентын зорилго бол бүтээгдэхүүнээ магтах биш, үнэ цэнэ, шийдэл, салбарын мэдлэгээ харуулж итгэл олох юм.

Холбоотой: Байгууллагын зах зээл дээр (B2B) дижитал маркетингийг хэрхэн зөв хийх вэ?

4. Түгээлтийн ялгаа

B2C: Сувгийн сонголт өргөн. Facebook, Instagram, YouTube, TikTok, Messenger, хэрэглэгчдийн байнга зочилдог мэдээллийн сайтууд. Мессенжер ба чатбот одоо контент хүргэх, асуултад хариулах гол суваг болсон. Онлайн сурталчилгаагаар контентоо идэвхжүүлэх нь түгээмэл практик. Хүмүүс асуултынхаа хариултыг хайдаг тул Google болон AI туслахуудад олдохуйц контент бэлтгэх нь үр дүнтэй.

B2B: Дээрх сувгууд бүгд ашиглагдаж болох ч илүү нарийн сонгох хэрэгтэй. Зарим B2B бизнест Instagram төдийлөн чухал биш байж болно. Харин LinkedIn шийдвэр гаргагчдад хүрэх чухал суваг. И-мэйл маркетинг, вэбсайт, блог B2C-д ч ажилладаг ч B2B-д бүр илүү өгөөжтэй.

B2B бүтээгдэхүүн ихэнхдээ нарийн сегментэд зориулагдсан тул сурталчилгааны нарийн чиглүүлэлтийг заавал ашигла. CRM-д байгаа харилцагчдын жагсаалтаар Custom Audience үүсгэх, Lookalike audience-аар төстэй байгууллагын хүмүүст хүрэх, вэбсайтад зочилсон, видео үзсэн хүмүүст дахин хүрэх аргууд хамгийн үр дүнтэй.

Холбоотой: Фэйсбүүк дээр зорилтод бүлэг буюу custom audience хэрхэн үүсгэх вэ?

AI-г B2B, B2C контентод хэрхэн ашиглах вэ?

AI контент маркетингийн зарчмыг өөрчлөөгүй, харин хувийн тохиргоог боломжтой болгосон. Өмнө нь зөвхөн том компани хийж чаддаг байсан ажлыг одоо жижиг баг хийж чадна.

B2B-д:

• Хувийн тохиргоотой мэйл: CRM-д байгаа харилцагчийн салбар, албан тушаал, өмнө сонирхсон зүйлд тулгуурлан мэйлийн хувилбаруудыг AI-аар бэлтгэх. Нэг ерөнхий мэйлийн оронд салбар бүрт тохирсон мессеж.
• LinkedIn контент: удирдлагын санаа, туршлагыг AI-тай хамт нийтлэл, богино пост болгон бүтэцлэх
• Кейс, гарын авлага: ярилцлагын тэмдэглэлээс эхний ноорог гаргах
• Сэжмийн судалгаа: уулзалтын өмнө тухайн байгууллагын нийтэд ил мэдээллийг товчлох

B2C-д:

• Олон хувилбар: нэг санаанаас пост, Reels-ийн скрипт, гарчгийн олон хувилбар
• Сегмент бүрт тохирсон мессеж: шинэ, давтан, удаан идэвхгүй байсан хэрэглэгчдэд өөр өөр санал
• Хурдан хариулт: AI чатбот мессеж, асуултад 24/7 хариулж, сонирхсон хүний нэр, утсыг CRM-д бүртгэнэ

Гэхдээ AI танай харилцагчийг, танай бизнесийн онцлогийг өөрөө мэдэхгүй. «Хувийн» мэйл буруу нэр, буруу баримттай очвол итгэлийг эвддэг. Тиймээс стратеги, баримт шалгалт, брэндийн дуу хоолой үргэлж хүний гарт байх ёстой.

Холбоотой: Сайн контент маркетинг хэрхэн хийх вэ? AI-тай ажиллах 5 алхам

DIMA энэ ажлыг хэрхэн хийдэг вэ

Бид B2B, B2C аль алинд нь ажиллахдаа эхлээд хэнд, ямар замаар зарж байгааг тодорхойлдог. Дараа нь контент, вэбсайт, AI чатбот, CRM, мэйлийн автомат цувааг нэг систем болгож холбоно. Багц, үнийг эндээс харж болно.

Танай контент B2B эсвэл B2C худалдан авагчдаа зөв хүрч байгаа эсэхийг шалгуулмаар байвал үнэгүй зөвлөгөө авах хүсэлт үлдээгээрэй, эсвэл 7211 9211 дугаарт залгаарай.