Facebook дээр зорилтот хэрэглэгчээ олох хоёр үндсэн зам бий. Нэг нь нас, байршил, сонирхол, зан төлөвөөр нь шинэ хүмүүсийг хайх. Нөгөө нь танайхыг аль хэдийн мэддэг хүмүүсийг эргүүлэн олох. Хоёр дахь замыг Custom Audience буюу өөрийн зорилтот бүлэг гэдэг бөгөөд ихэнх бизнест хамгийн бага зардлаар хамгийн их үр дүн авчирдаг.

Учир нь танай сайтаар зочилсон, пэйж рүү мессеж бичсэн, постыг тань хадгалсан, өмнө нь худалдан авалт хийсэн хүн сонирхлоо аль хэдийн илэрхийлсэн. Тэдэнд дараагийн мэдээлэл, контент, саналаа хүргэх нь танихгүй олон нийтэд зар цацахаас илүү үр өгөөжтэй.

Энэ нийтлэлийг анх 2020 онд бичсэн. Өнөөдрийн Ads Manager-т тааруулан шинэчилж, “Фэйсбүүкийн хуудсанд идэвхтэй байсан хүмүүсийг хэрхэн олох вэ?” болон “Фэйсбүүк дээр зорилтот сегментээрүүгээ чиглэн сурталчилгаагаа хийх эхний алхамууд” нийтлэлүүдийн хэрэгтэй хэсгийг энд нэгтгэв.

Эхлэхэд юу хэрэгтэй вэ?

• Сурталчилгааны данс: Visa, Mastercard зэрэг олон улсын төлбөрийн карт холбосон Meta-гийн сурталчилгааны данс.
• Хуудас, дансны эрх: Facebook хуудас, сурталчилгааны дансаа удирдах эрхтэй байх.
• Meta Pixel: вэбсайтын зочдоор аудитори үүсгэх бол сайтдаа Pixel суулгасан, боломжтой бол Conversions API-тай холбосон байх.
• Харилцагчийн жагсаалт: утас, и-мэйлээр аудитори үүсгэх бол хэрэглэгчдээсээ зөвшөөрөл авч цуглуулсан, цэгцтэй жагсаалт.

Custom Audience-ийн төрлүүд

Ads Manager-ийн Audiences хэсэгт Custom Audience үүсгэхдээ эхлээд эх сурвалжаа сонгоно. Гол эх сурвалжууд:

1. Вэбсайтын зочид

Pixel-ийн бүртгэсэн мэдээллээр сайтаар зочилсон хүмүүсийн бүлэг үүсгэнэ. Хугацааг хэдэн хоногоор тохируулах бөгөөд вэбсайтын хувьд дээд хязгаар нь одоогоор 180 хоног. Бүх зочдоос гадна нарийвчилсан бүлэг үүсгэж болно:

• тодорхой хуудас, эсвэл хаягтаа тодорхой үг агуулсан хуудсаар зочилсон хүмүүс;
• нэг хуудсаар орсон ч нөгөө хуудсаар ороогүй хүмүүс, жишээ нь үнэ үзсэн ч форм илгээгээгүй;
• өмнө зочилсон ч сүүлийн хэсэг хугацаанд ороогүй хүмүүс.

2. Facebook хуудас, Instagram дээр идэвх гаргасан хүмүүс

Энэ бол хуудсыг тань дагаагүй ч контентыг тань сонирхдог хүмүүсийг олох хамгийн хялбар арга. Хуудасны дагагчдад зар харуулах амархан, харин дагаагүй ч идэвхтэй хүмүүсийг энэ аргаар олно. Бүх идэвхтэй хүмүүсээр, эсвэл үйлдлээр нь нарийвчлан үүсгэж болно:

• хуудсаар зочилсон хүмүүс;
• пост, сурталчилгаан дээр үйлдэл хийсэн хүмүүс;
• хуудасны үйлдэлд дуудах товч (холбогдох, залгах гэх мэт) дарсан хүмүүс;
• хуудас руу мессеж бичсэн хүмүүс;
• хуудас эсвэл постыг хадгалсан хүмүүс.

Хугацааг зорилгоосоо хамааруулж сонго. Жишээ нь 30 гэвэл сүүлийн нэг сарын, 14 гэвэл сүүлийн хоёр долоо хоногийн идэвхтэй хүмүүс орно.

3. Видео үзсэн, форм нээсэн хүмүүс

Reels, видеог тань үзсэн, эсвэл Instant Form буюу сэжмийн формыг нээсэн, бөглөсөн хүмүүсээр ч бүлэг үүсгэж болно. Видео үзсэн хүмүүс дараагийн, илүү дэлгэрэнгүй контентод хамгийн тохиромжтой.

4. Харилцагчийн жагсаалт

CRM-д байгаа утасны дугаар, и-мэйлийн жагсаалтаа файлаар оруулна. Meta мэдээллийг тааруулахаасаа өмнө нууцалж (hash) боловсруулдаг. Утасны дугаарыг улсын кодтой нь (976) оруулбал тааруулалт илүү сайн болдог.

Сул тал нь: тухайн хүн тэр дугаар, и-мэйлээрээ Facebook-т бүртгүүлээгүй бол түүнд хүрэхгүй. Гэсэн ч өмнө нь танайхаас авч байсан хүмүүст SMS шиг төвөг учруулалгүй контентоо хүргэх хамгийн найдвартай арга хэвээр. Өмнө авч байсан хүн дахин авах магадлал өндөр шүү дээ.

Холбоотой: Фэйсбүүкээс хэрэглэгчийн мэдээллийг хэрхэн бүртгэх вэ?

Lookalike аудитори: төстэй шинэ хүмүүс

Custom Audience-ээ эх сурвалж болгон Lookalike аудитори үүсгэвэл таны сайн харилцагчидтай төстэй зан төлөв, сонирхолтой шинэ хүмүүсийг Meta олж өгнө. Хүн бүр утасны дугаараа Facebook-т бүртгүүлдэггүй тул жагсаалтаар хүрч чадаагүй хүмүүст ийм аргаар хүрнэ. Эх сурвалж нь чанартай байх тусам (жишээ нь зөвхөн худалдан авсан хүмүүс) Lookalike илүү сайн болдог.

Аудиторигоо хэрхэн ашиглах вэ?

Шүүлтүүртэй хослуул. Аудиториэ байршил, нас зэрэг шүүлтүүртэй хослуулж болно. Жишээ нь хотын төвд байрладаг ресторан газрын зураг дээр байршлаа тэмдэглээд эргэн тойрны хүмүүст, орон нутагт зориулсан мэдээллийг тухайн аймгийн хүмүүст хүргэнэ.

Хадгалж, дахин ашигла. Олон шүүлтүүр хослуулсан бүлгээ Saved Audience болгон хадгалбал зар бүрт дахин оруулах шаардлагагүй.

Хасах нь чухал. Сүүлийн үед худалдан авсан хүмүүсийг хасвал мөнгө хэмнэнэ. Сүүлд идэвхтэй байсан хүмүүсийг хасвал удаан идэвхгүй байгаа хүмүүсийг эргүүлэн татах кампанит ажил хийж болно.

Мессеж бичсэн хүмүүст Messenger-ээр. Хуудас руу тань бичиж байсан хүмүүст Click-to-Messenger зар харуулж, яриаг дахин эхлүүлж болно.

Нэрээ ойлгомжтой өг. Олон бүлэг үүсгэсний дараа будилахгүйн тулд нэр, тайлбарт нь эх сурвалж, хугацааг бич. Жишээ нь “Сайт, үнийн хуудас, 30 хоног”.

Advantage+ кампанит ажлын үед Meta таны аудиторийг заримдаа хатуу хязгаар биш, чиглэл болгон ашиглаж, илүү үр дүнтэй хүмүүсийг олбол хүрээгээ тэлдэг гэдгийг санаарай. Яг тухайн бүлэгт л харуулах шаардлагатай бол тохиргоогоо шалгаарай.

Төрсөн өдрийн жишээ

Төрсөн өдөр ойртож буй хүмүүс, тэдний найз нөхөд, гэр бүлд ямар бүтээгдэхүүн хэрэгтэй вэ? Бэлэг, цэцэг, бялуу, ресторан, караоке, кино гээд урт жагсаалт гарна. Жишээ нь ресторан төрсөн өдрөө тэмдэглэж буй хүнд бэлэг санал болгож болно. Заавал зар биш, “Төрсөн өдөрт зориулсан цэцэг сонгох зөвлөмж” гэх мэт хэрэгтэй контент ч борлуулалт авчирдаг.

Meta-гийн нарийвчилсан чиглүүлэлтэд амьдралын үйл явдлаар чиглүүлэх сонголтууд байдаг ч Meta тэдгээрийг үе үе өөрчилж, хасдаг тул тохиргоо хийхдээ одоо байгаа эсэхийг шалгаарай. Илүү найдвартай арга бол өөрийн өгөгдөл. CRM-дээ харилцагчдынхаа төрсөн өдрийг хадгалдаг бол тухайн сард төрсөн хүмүүсийн жагсаалтаар Custom Audience үүсгэж, тэдэнд зориулсан санал хүргэж болно.

Бидний дахин чиглүүлэлтийн туршлагаас

• Нэг бүлэгт нэг мессеж. Блог уншсан хүн, үнэ үзсэн хүн хоёр өөр шатанд байгаа. Тэдэнд нэг зар бүү харуул.
• Жагсаалтаа шинэчилж бай. Харилцагчийн жагсаалт хуучирвал үр дүн нь буурдаг. CRM-тэй холбож, тогтмол шинэчил.
• Аудитори жижиг бол хугацааг уртасга. Сайтын хандалт бага бол хугацааг уртасгаж, эсвэл хэд хэдэн эх сурвалжийг нэгтгэ.
• Мессеж ирсэн бол хариул. Хамгийн сайн аудитори ч хариулт хоцорвол үр дүнгүй. AI чатбот энэ завсрыг 24/7 хаадаг.

AI-аар хэрхэн хурдасгах вэ?

Персонагаа AI-д тайлбарлаад ямар Custom Audience, ямар мессежээр хүрэх санааг гаргуул. CRM-ийн өгөгдлөө AI-аар бүлэглэж, худалдан авалтын давтамж, сонирхлоор нь сегмент гаргаж болно. Гэхдээ хэнд юу санал болгох вэ гэдэг стратеги, хэрэглэгчийн мэдээллийг хууль, ёс зүйн дагуу ашиглах хариуцлага хүнийх хэвээр.

Холбоотой: Фэйсбүүк дээр яагаад дахин чиглүүлэх маркетинг хийх хэрэгтэй вэ?

Танай харилцагчдын жагсаалт, сайтын зочдыг борлуулалт болгон хувиргах аргыг ярилцмаар байвал үнэгүй зөвлөгөө авах хүсэлт үлдээгээрэй, эсвэл 7211 9211 дугаарт залгаарай.