Ямар дизайныг сайн, ямар дизайныг муу гэх вэ? Та хараад ялгаж чадах уу? Дизайн урлагаас тодорхой зорилгод чиглэдгээрээ ялгаатай. График дизайн ажлыг тогтвортой, үр дүнтэй, тэнцвэртэй, сэтгэл татам болгохын тулд тодорхой дүрэм баримталдаг. Эдгээрийг зөрчвөл дизайны тэнцвэр алдагдаж, сул, үр дүнгүй болдог.

График дизайны зарчим гэдэг нь үр дүнтэй, анхаарал татах зохиомж хийхийн тулд дизайнеруудын дагаж мөрддөг дүрмүүд юм. Сошиал медиагийн постер, рестораны цэс, аялал жуулчлалын зар, лого гээд ямар ч ажилд эдгээр зарчим адилхан үйлчилнэ. Доор үндсэн зарчмуудыг нэг бүрчлэн авч үзье.

Холбоотой: Контент маркетингийн нэг хэсэг болох график дизайныг хийх үндсэн дүрмүүд

Ойр байдал (proximity)

Анхлан суралцаж буй дизайнеруудын нэг түгээмэл алдаа бол хуудасныхаа зай болгоныг дүүргэх гэж оролддог явдал. Бүх зайг дүүргэвэл хоорондоо холбоотой хэсгүүд сарниж, энд тэнд тархсан элементүүд уншигчид мэдээллийн уялдааг ойлгоход хэцүү болгодог.

Ойр байдлын зарчим гэдэг нь хоорондоо холбоотой элементүүдийг хамтад нь байрлуулахыг хэлнэ. Энгийнээр хэлбэл, элементүүдийг ойр байрлуулснаар «энэ хэд холбоотой шүү» гэж уншигчдад хэлж өгдөг.

Холбоотой элементүүд нэгдсэн нэг бүлэг үүсгэдэг бол хамааралгүй элементүүдийг аль болох бие биеэс нь холдуулах хэрэгтэй. Элементүүдийн хоорондох зай хуудсан дээр харцыг тодорхой чиглэлд хөтөлдөг.

Жишээ нь: рестораны цэсэнд хоолны нэр, найрлага, үнийг нэг бүлэг болгож ойр байрлуулаад, хоол бүрийн хооронд хангалттай зай үлдээвэл цэс хамаагүй амархан уншигдана.

Зэрэгцүүлэлт (alignment)

Зэрэгцүүлэлт дизайны элементүүдийг цэгцэлж, бүлэглэж, харааны холбоо үүсгэдэг. Ингэснээр үзэгч хамгийн чухал мэдээллийг амархан олж, уншихад хялбар болдог.

Зэрэгцүүлэлтийг буруу ашигласан дизайн эмх замбараагүй ширээтэй адил. Ажлын ширээ эмх замбараагүй байх ямар бухимдалтайг та мэдэж байгаа байх. Зэрэгцүүлэлтийн зарчмыг баримтлаагүй дизайн эмх замбараагүй, логикгүй харагддаг.

Контраст ялгарал бий болгодог

Ямар ч дизайнд үзэгчийн харцыг хамгийн түрүүнд гол элемент рүү татах нь маш чухал. Эрс тэс байдал буюу контраст элементүүдийг онцолж, анхаарал татаж, харж буй зүйлээ ойлгоход хялбар болгодог. Зохиомж дахь хоёр буюу түүнээс дээш элемент хоорондоо ялгаатай үед контраст үүсдэг.

Контрастаар ач холбогдлыг тодруулж, сэтгэл хөдөлгөм, сонирхолтой зохиомж бүтээдэг. Жишээлбэл, ижил хэмжээтэй, ижил зайтай дөрвөлжингүүдээр дүүрсэн хуудсанд ялгарал байхгүй тул юу ч анхаарал татахгүй. Харин нэг дөрвөлжинг дугуйгаар солиход ялгарал үүсч, бүх анхаарал тэр дугуй руу төвлөрнө.

Контрастыг дараах элементүүдээр бий болгодог:

• Өнгө
• Хэлбэр
• Текстур
• Хэмжээ
• Фонт

Контраст муутай дизайн уйтгартай, сонирхолгүй болох магадлалтай. Тиймээс ажил бүртээ юуг онцлохоо сайн тодорхойлж, түүндээ тохирсон контрастыг зөв гаргах хэрэгтэй.

Жишээ нь: аялал жуулчлалын постер дээр чиглэлийн нэр болон үнэ эсвэл огноо гэсэн нэг гол мэдээллийг том, тод өнгөөр гаргаж, бусдыг нь жижиг, зөөлөн өнгөөр өгвөл постерыг гүйлгэж харсан хүн ч гол санааг нь авна.

Холбоотой: Инфографик гэж юу вэ? Түүнийг хэрхэн хийх вэ?

Яагаад «сондгой тоотой» гэж?

Тэгш тооны объекттой ажлаас (гэрэл зураг ч мөн адил) сондгой тооны объекттой ажил яагаад илүү анхаарал татаж, тааламжтай харагддагийг та мэдэх үү? Учир нь тархи ухамсарлаж байгаа эсэхээс үл хамааран аливаа зүйлийг бүлэглэж, хос хосоор нь хуваах хандлагатай байдаг. Тиймээс тэгш тоотой зүйлсийг төдийлөн анхааралгүй гүйлгэж хардаг.

Сондгой тооны дүрэм нэг объектыг зохиомжийн төвд байрлуулж онцлох боломж олгодог. Гол объектын хоёр талд бусад объектыг байрлуулж сондгой тооны бүлэг үүсгэвэл анхаарал голд нь төвлөрдөг. Хүний нүд байгалиасаа тэнүүчлэх хандлагатай тул энэ дүрэм үзэгчийн харцыг яг таны хүссэн хэсэг рүү татах хялбар арга юм.

Жишээ нь: кофе шопын постерт гурван аяга кофег байрлуулахдаа шинэ ундаагаа голд нь, бусдыг хоёр талд нь тавивал харц гол бүтээгдэхүүн рүү шууд очно.

Лого

Лого бол брэндийн нэг хэсэг бөгөөд маркетингтай салшгүй холбоотой. Олонд танигдсан брэндийн зөвхөн логог хараад л хэрэглэгч ямар компани болохыг шууд таньдаг. Тиймээс лого нүдэнд тусаж, санаанд үлдэхүйц энгийн дүрслэлтэй, утга агуулгатай байх ёстой.

Бүтээлч логонууд ихэвчлэн үсгээр нэрээ бичихээс гадна дүрсээрээ давхар утга санаа илэрхийлдэг. Энд дээрх зарчмууд бүгд ажилладаг: сөрөг орон зайг ашиглан нууц дүрс бий болгох, цөөн өнгөөр тод контраст гаргах, жижиг хэмжээнд ч уншигдахуйц энгийн байх.

Холбоотой: Брэндээ хэрэглэгчийн тархинд хэрхэн байршуулах вэ?

AI дизайны хэрэгслийн үед брэндээ хэрхэн хадгалах вэ?

Өнөөдөр Canva AI зэрэг хэрэгслээр постер, цэс, сошиал медиагийн зургийн олон хувилбарыг хэдхэн минутад гаргаж болдог болсон. Энэ нь жижиг бизнест маш том боломж. Гэхдээ нэг эрсдэл бий: пост бүр өөр загвар, өөр өнгө, өөр фонттой гарч, брэнд тань нэгдмэл дүр төрхөө алддаг.

Үүнээс сэргийлэхийн тулд:

• Брэндийн дүрэмтэй бол: лого, үндсэн өнгө, фонт, зургийн хэв маягаа нэг баримтад тодорхойлж, AI хэрэгсэлдээ тэр дүрмээ ашигла.
• Загвараа тогтоо: постер, Reels-ийн нүүр, цэс зэрэгт байнга ашиглах цөөн загвартай болж, тэдгээрийгээ л өөрчилж ашигла.
• Зарчмаар шалга: AI-ийн гаргасан загвар бүрийг ойр байдал, зэрэгцүүлэлт, контрастын зарчмаар нэг бүрчлэн хар.

AI хурд өгнө. Харин брэндийн дүр төрх, мессежийн үнэн зөв байдал, эцсийн чанарыг хүн хариуцна.

Эх сурвалж: @DesignDay

Танай постер, лого, брэндийн дүр төрх нэгдмэл харагдаж байгаа эсэхийг шалгуулмаар байвал үнэгүй зөвлөгөө авах хүсэлт үлдээгээрэй, эсвэл 7211 9211 дугаарт залгаарай.