Хэдэн арван жилийн өмнө маркетингийн менежер гэдэг хамгийн их гүйдэг хүн байв. Байгууллагуудын хаалгыг тогшиж, телевиз, сонинд сурталчилгаа байршуулж, бараа бүтээгдэхүүнээ биечлэн таниулдаг байлаа. Дижитал маркетинг тэр ажлыг үндсээр нь өөрчилсөн. Зөвхөн маркетерыг ч биш, уншигч, үзэгч, хэрэглэгчийг ч өөрчилсөн.

Одоо дахин нэг том өөрчлөлт явагдаж байна. Хиймэл оюун ухаан (AI) контент бүтээх, сурталчилгаа чиглүүлэх, хэрэглэгчтэй харилцах ажлын нэг хэсгийг гүйцэтгэдэг болжээ. Энэ нийтлэлийг анх 2020 онд бичсэн бөгөөд хуучирсан тоо баримтын оронд дижитал маркетинг хэрхэн хөгжиж ирсэн, AI эрин үед юу өөрчлөгдөж, юу нь хэвээр байгааг тайлбарлахаар шинэчлэв.

Дижитал маркетинг гэж юу вэ?

Дижитал маркетинг гэдэг нь компьютер, ухаалаг утас, таблет зэрэг цахим төхөөрөмж болон вэбсайт, и-мэйл, мобайл апп, сошиал сүлжээ, хайлтын систем зэрэг цахим сувгаар дамжуулан хийгддэг маркетинг юм. Онлайн маркетинг, интернет маркетинг, вэб маркетинг гэж ч нэрлэдэг.

Уламжлалт маркетингаас ялгарах хоёр гол давуу тал бий:

• Чиглүүлэх: сурталчилгааг зөвхөн тодорхой зорилтот хэрэглэгчдэд хүргэх
• Хэмжих: хэдэн хүнд хүрсэн, хэд нь дарсан, хэд нь худалдан авсныг тоогоор харж, хөрөнгө оруулалтын өгөөжөө тооцох

Хэрхэн хөгжиж ирсэн бэ?

Дижитал маркетингийн үндэс интернет түгээмэл болохоос ч өмнө тавигдсан гэж үздэг. Тухайн үед SoftAd Group (одоогийн ChannelNet) компани автомашины брэндүүдэд зориулсан кампанит ажил хийжээ. Сэтгүүлд хавсаргасан хуудсыг бөглөж илгээсэн хүмүүст машины мэдээлэл бүхий уян диск, туршиж жолоодох санал илгээдэг байсан нь хэрэглэгчээс мэдээлэл авч, хариуд нь үнэ цэнэ өгөх анхны жишээнүүдийн нэг болсон.

Цаашлаад гурван том давалгаа дижитал маркетингийг өнөөгийн хэлбэрт нь хүргэсэн.

• Вэб ба хайлт: байгууллага бүр вэбсайттай болж, хүмүүс мэдээллээ хайлтын системээс олдог болсон
• Сошиал медиа: брэнд хэрэглэгчтэйгээ шууд харилцаж, хэрэглэгч өөрөө контент бүтээгч болсон
• Мобайл: интернетийн хэрэглээ гар утас руу шилжиж, хайлт, худалдан авалт, харилцаа бүгд утсан дээр болдог болсон

Монголын бизнесүүд ч сошиал медиа маркетингийг эрчимтэй эзэмшсэн. Эхэндээ фэн, лайкаа өсгөхөд анхаарч байсан бол аажмаар контент маркетинг, сэжим цуглуулах, борлуулалттай уялдуулах руу шилжсэн.

Дижитал маркетингийн үндсэн ойлголтууд

Pull ба Push. Pull буюу татах маркетинг идэвхтэй мэдээлэл хайж буй хүмүүст контентоороо хүрдэг. Push буюу түлхэх маркетинг хүмүүсийн хайгаагүй мэдээллийг тэдэнд хүргэдэг. Инбаунд маркетинг бол татах аргын системтэй хэлбэр.

Сегментчлэл ба дахин чиглүүлэлт. Вэбсайт, сошиал сувагт хийсэн үйлдлээр нь хэрэглэгчийг бүлэглэж, сонирхолд нь нийцсэн сурталчилгааг дахин хүргэх боломжтой. Жишээ нь гоо сайхан, эрүүл хооллолтын контент үздэг хүмүүст гоо сайхны бүтээгдэхүүний сурталчилгаа илүү үр дүнтэй.

Нөлөөллийн маркетинг. Тодорхой сэдвээр итгэл хүлээсэн хүмүүсээр дамжуулан зорилтот хэрэглэгчдэд хүрэх. Дэлгэрэнгүйг нөлөөллийн маркетинг хуудаснаас үзнэ үү.

CRM. Хэрэглэгч бүртэй хэзээ, юу ярьсан, юу сонирхсоныг нэг дор хадгалж, маркетинг, борлуулалтаа уялдуулах систем. HubSpot CRM бол жижиг, дунд бизнест түгээмэл хэрэглэгддэг шийдлүүдийн нэг.

Контент хаан, контекст хатан. Сошиал сувагт контент дүүрэн. Хэрэглэгч алийг нь үзэх вэ гэдгийг контекст шийддэг: худалдан авалтын аль шатанд яваа, ямар зан төлөвтэй хүнд, хэзээ, ямар сувгаар, ямар хэлбэрээр хүргэх вэ гэдэг.

Холбоотой: Инбаунд болон уламжлалт маркетингийн ялгаа

Мобайл хэвээр төв нь

Хайлтын ихэнх хэсэг одоо гар утаснаас хийгддэг. Google вэбсайтыг үнэлэхдээ гар утасны хувилбарыг нь түлхүү харгалздаг болсон. Гар утсанд эвтэйхэн биш, удаан ачааллдаг вэбсайт хайлтад ч, хэрэглэгчийн сэтгэлд ч ялагдана. Хуучирсан вэбсайтаа шинэчлэх нь дижитал маркетингийн суурь алхам.

AI эрин үед юу өөрчлөгдөж байна вэ?

AI дижитал маркетингийн зарчмыг өөрчлөөгүй. Зөв хүнд, зөв мессежийг, зөв цагт хүргэх, үр дүнгээ хэмжих нь хэвээр. Өөрчлөгдсөн зүйл бол хурд, цар хүрээ.

• Контент: пост, нийтлэл, видео скрипт, зургийн эхний хувилбарыг AI хэдхэн минутад гаргадаг
• Сурталчилгаа: Meta-гийн Advantage+ кампанит ажил зорилтот бүлэг, сурталчилгааны хувилбарыг AI-аар өөрөө оновчилдог болсон
• Хайлт: Google AI Overviews, ChatGPT search зэрэг AI хариулт хүмүүс мэдээлэл хайх хэлбэрийг өөрчилж байна
• Харилцаа: AI чатбот мессежид 24/7 хариулж, сонирхсон хүний мэдээллийг CRM-д бүртгэдэг
• Автоматжуулалт: CRM сэжим бүрт тохирсон и-мэйлийн цуваа, сануулга, борлуулалтын даалгаврыг автоматаар үүсгэдэг
• Төлөвлөлт: DIMA-гийн PlanAI Монгол хэрэглэгчийн зан төлөв, улирлын эрэлт, баяр ёслол, сувгийн бодит зардалд тулгуурлан маркетингийн төлөвлөгөөг ойролцоогоор 30 минутад гаргадаг

Холбоотой: AI-д суурилсан inbound marketing систем гэж юу вэ?

Юу нь хүний ажил хэвээр үлдэх вэ?

AI хурд өгдөг ч танай бизнесийг таних мэдлэг, үнэн зөв мэдээлэл, брэндийн өөрийн дуу хоолойг өгдөггүй. Хэнд үйлчлэх, юугаараа ялгарах, ямар амлалт өгөх вэ гэдэг стратегийн шийдвэр, тоо баримт шалгах, эцсийн найруулга хүний гарт үлдэнэ. Хүн бүр ижил AI хэрэгсэл ашиглах тусам эдгээр нь өрсөлдөөний гол давуу тал болж байна.

Жижиг бизнес хаанаас эхлэх вэ?

1. Зорилтот хэрэглэгч, байр сууриа тодорхой болго.
2. Гар утсанд тохирсон вэбсайтыг бүх контентын «гэр» болго.
3. Мессеж, сэжмээ алдахгүйн тулд AI чатбот, CRM тавь.
4. Контент, сурталчилгааны ажилд AI-г хурдасгагч болгон ашигла.
5. Сар бүр лайк биш, сэжим, борлуулалтаа хэмж.

Холбоотой: 2026 онд бизнесүүд яагаад AI маркетинг ашиглах ёстой вэ?

DIMA 2019 оноос хойш жижиг, дунд бизнесүүдэд дижитал, инбаунд маркетинг хийж ирсэн бөгөөд одоо AI-д суурилсан системээр ажилладаг. Эхлээд зорилтот хэрэглэгч, вэбсайт, чатбот, CRM-ээ босгоод, дараа нь сар бүр контент, сувгаа ажиллуулдаг. Багц, үнийг эндээс харж болно.

Танай дижитал маркетинг AI эрин үед хаана хоцорч байгааг мэдмээр байвал үнэгүй зөвлөгөө авах хүсэлт үлдээгээрэй, эсвэл 7211 9211 дугаарт залгаарай.